Пра нас

Галерэя “Ў” – гэта прастора творчай і інтэлектуальнай Беларусі, вольная пляцоўка для лакальнага і міжнароднага культурніцкага дыялогу, якая спрыяе фармаванню актуальнага разумення выбітнай ролі культуры і мастацтва ў сучасным грамадстве.

Выставачная прастора Галерэі “Ў” –  месца для эксперыментаў, свабоды творчага выяўлення, камунікацыі паміж мастаком і гледачом. Галерэя “Ў” уважліва сочыць за лепшымі арт-праектамі Усходняй і Заходняй Еўропы, каб спрыяць далучанасці сучаснага беларускага мастацтва да сусветнага. Мы робім усё магчымае, каб сучаснае беларускае мастацтва, праекты ды персаналіі арт-супольнасці Беларусі не толькі нязменна прысутнічалі ў беларускай публічнай прасторы, але станавіліся больш адметнымі ў агульнаеўрапейскім мастацкім кантэксце.

Галерэя “Ў” падтрымлівае міждысцыплінарныя даследчыя праекты ў супрацоўніцтве з прафесійнай экспертнай супольнасцю Беларусі ў такіх навуковых кірунках, як візуальна-культурніцкія і крытычныя ўрбаністычныя даследванні, філасофія, сацыялогія, гендарныя праблемы, сучасная гісторыя і грамадскасць.

Арганізацыя адукацыйных праграм, круглых сталоў, дыскусій, майстар-класаў, лекцый, семінараў, сустрэч з выбітнымі прадстаўнікамі сучаснай арт-крытыкі – прыярытэтны напрамак дзейнасці Галерэі “Ў”. Усё гэта дапамагае стварыць актыўную камунікацыйную пляцоўку, прызначаную для ўзаемадзеяння гледачоў, мастакоў, куратараў, арт-менеджараў, крытыкаў і даследчыкаў. Мы ўпэўнены, што гэта робіць вялікі ўнёсак у развіццё інстытута беларускай арт-крытыкі, традыцыі мастацкай аналітычнай працы, станаўленне культурнай палітыкі Беларусі.

Галерэя “Ў” з’яўляецца прасторай медыяцыі паміж прадстаўнікамі незалежнага арт-кола, бізнеса, НДА сектара і грамадскай супольнасцю. Асобную ўвагу каманда Галерэі аддае працы і праграмам медыяцыі для наведвальнікаў з асаблівасцямі развіцця і іншымі магчымасцямі, бо Галерэя сучаснага мастацтва “Ў” – месца для ўсіх, усіх – без выключэнняў! 

Мы любім мастацтва цалкам і безумоўна!